రాయలసీమలో పూర్తిగా విస్తరించిన ‘నైరుతి’

ఈనాడు డిజిటల్, విశాఖపట్నం: నైరుతి రుతుపవనాలు రాయలసీమ జిల్లాల్లో పూర్తిగా విస్తరించినట్లు అమరావతి వాతావరణ కేంద్రం వెల్లడించింది. రాబోయే 3-4 రోజుల్లో కోస్తాంధ్ర, కర్ణాటక, మహారాష్ట్ర, తెలంగాణ, ఛత్తీస్‌గఢ్, ఒడిశాలోని కొన్ని ప్రాంతాలకు విస్తరించేందుకు పరిస్థితులు అనుకూలంగా ఉన్నాయని వివరించింది. మరోవైపు దక్షిణ కోస్తాపై కొనసాగుతున్న ఆవర్తనం ప్రభావంతో రాబోయే నాలుగు రోజుల్లో రాష్ట్రంలో ఓ మోస్తరు నుంచి భారీ వర్షాలు కురుస్తాయని వాతావరణ నిపుణులు అంచనా వేస్తున్నారు. బుధవారం పార్వతీపురం మన్యం, అల్లూరి సీతారామరాజు, కర్నూలు, నంద్యాల, అనంతపురం, శ్రీసత్యసాయి, వైఎస్సార్, అన్నమయ్య, చిత్తూరు, తిరుపతి జిల్లాల్లో అక్కడక్కడా ఓ మోస్తరు నుంచి భారీ వర్షాలు కురిసే అవకాశముందని విపత్తుల నిర్వహణ సంస్థ పేర్కొంది. శ్రీకాకుళం, విజయనగరం, కాకినాడ, డా.బీఆర్‌ అంబేడ్కర్‌ కోనసీమ, తూర్పుగోదావరి, పశ్చిమగోదావరి, ఏలూరు, కృష్ణా, ఎన్టీఆర్, గుంటూరు, బాపట్ల, పల్నాడు, ప్రకాశం, నెల్లూరు జిల్లాల్లో తేలికపాటి నుంచి ఓ మోస్తరు వర్షాలు కురవొచ్చని తెలిపింది. మంగళవారం తిరుపతి, చిత్తూరు, శ్రీకాకుళం, కర్నూలు, అన్నమయ్య, వైఎస్సార్, పల్నాడు, ప్రకాశం తదితర జిల్లాల్లో తేలికపాటి నుంచి ఓ మోస్తరు వర్షాలు కురిశాయి. సాయంత్రం 6 గంటల వరకు అత్యధికంగా తిరుపతి జిల్లా గునుపూడులో 59 మి.మీ. వర్షపాతం నమోదైంది. సోమవారంతో పోలిస్తే మచిలీపట్నం, నందిగామ, గన్నవరం, అమరావతి, ఒంగోలు, కావలి, నెల్లూరు, నంద్యాల, కర్నూలు, కడప, అనంతపురం, తిరుపతి తదితర ప్రాంతాల్లో ఉష్ణోగ్రతలు 3 నుంచి 7 డిగ్రీలు పెరిగాయి.