ఆరోగ్య విశ్వవిద్యాలయానికి ఎన్టీఆర్‌ పేరు పునరుద్ధరించాలి

ప్రభుత్వానికి వర్సిటీ బోధనేతర సిబ్బంది లేఖ

ఈనాడు, అమరావతి: విజయవాడలోని డాక్టర్‌ వైఎస్సార్‌ ఆరోగ్య విజ్ఞాన విశ్వవిద్యాలయానికి మాజీ ముఖ్యమంత్రి దివంగత ఎన్టీఆర్‌ పేరును పునరుద్ధరించాలని కొత్త ప్రభుత్వానికి బోధనేతర ఉద్యోగుల సంఘం గురువారం లేఖ రాసింది. దేశంలోనే తొలి ఆరోగ్య విజ్ఞాన విశ్వవిద్యాలయాన్ని విజయవాడలో 1986 నవంబరు 1న ఎన్టీఆర్‌ హయాంలో నెలకొల్పారని సంఘం గౌరవ అధ్యక్షుడు కర్రి నరసింహారావు గుర్తుచేశారు. దీనికి 1999లో నాటి ముఖ్యమంత్రి చంద్రబాబు ఎన్టీఆర్‌ పేరు పెట్టగా, దాన్ని గత ప్రభుత్వం తొలగించి వైఎస్సార్‌ పేరు తగిలించడం సరికాదన్నారు. 38 ఏళ్లుగా ఆటుపోట్లు లేకుండా సాగిన వర్సిటీకి గత ప్రభుత్వం నిధులు ఇవ్వకుండా అభివృద్ధిని విస్మరించిందని వాపోయారు. ఈ ప్రభుత్వం విశ్వవిద్యాలయాలు, ఉద్యోగుల సంక్షేమానికి చర్యలు తీసుకోవాలని కోరారు. వర్సిటీకి చెందిన రూ.400 కోట్లను రాబట్టుకోవడం సహా పలు విషయాలపై త్వరలోనే ప్రభుత్వాన్ని కలిసి వివరిస్తామని నరసింహారావు వెల్లడించారు.