వైద్య, ఆరోగ్య శాఖలో తాత్కాలికంగా నియామకాల నిలుపుదల

ఈనాడు, అమరావతి: స్టాఫ్‌ నర్సుల నియామకం, గ్రామ, వార్డు సచివాలయాల్లో పనిచేసే ఏఎన్‌ఎంల్లో అర్హులకు ఎంపీహెచ్‌ఏలు(ఫిమేల్‌)గా పదోన్నతులు కల్పించడాన్ని రాష్ట్ర వైద్య ఆరోగ్య శాఖ తాత్కాలికంగా నిలిపివేసింది. ఈ విద్యా సంవత్సరంలో కొత్తగా ప్రారంభం కానున్న 5 ప్రభుత్వ వైద్య కళాశాలల్లో అవసరాల కోసం ఉద్యోగ నియామకాలు జరుగుతున్నాయి. కడప ప్రాంతీయ ఆరోగ్య శాఖ అధికారులు.. 206 స్టాఫ్‌ నర్సుల ఉద్యోగాల భర్తీకి ఇటీవల నోటిఫికేషన్‌ ఇచ్చారు. ముందుగా ప్రకటించినట్లు దరఖాస్తు చేసిన వారికి శుక్రవారం కాకుండా.. గురువారమే కౌన్సెలింగ్‌ నిర్వహించాలనుకోవడం వివాదాస్పదమైంది. అలాగే.. సచివాలయాల్లోని ఏఎన్‌ఎంలకు ఎంపీహెచ్‌ఏలుగా పదోన్నతి కల్పించేందుకు 10న జాబితా, 11న కౌన్సెలింగ్, 12న ఉత్తర్వులు ఇవ్వాలని నిర్ణయించడంపైనా అభ్యంతరాలు వచ్చాయి. గత ప్రభుత్వ నిర్ణయాలు అమలు చేయడంపై కొందరు అనుమానాలు వ్యక్తం చేశారు. ఈ పరిణామాల నేపథ్యంలో తదుపరి ఉత్తర్వులు జారీ చేసే వరకు పదోన్నతులు, నియామకాల ప్రక్రియను నిలిపివేయాలని జిల్లాలకు వైద్య, ఆరోగ్య శాఖ నుంచి తాజాగా ఆదేశాలు వెళ్లాయి. కొత్త ప్రభుత్వం ఏర్పడిన అనంతరం వీటిని తిరిగి చేపట్టే అవకాశాలు ఉన్నాయి.