తప్పు చేస్తే చట్టపరిధిలోనే సమాధానమిద్దాం

భౌతిక దాడులకు పాల్పడొద్దని పవన్‌ కల్యాణ్‌ చెప్పారు
మచిలీపట్నం ఎంపీగా ఎన్నికైన బాలశౌరి వ్యాఖ్యలు

పరిమళ్‌ నత్వానితో బాలశౌరి 

ఈనాడు, అమరావతి: అరాచకమే వైకాపా విధానమని.. వారికి కేసులంటే భయం లేదు, చట్టమంటే విలువ లేదని మచిలీపట్నం నుంచి ఎంపీగా ఎన్నికైన వల్లభనేని బాలశౌరి ధ్వజమెత్తారు. వైకాపా నేతలు, కార్యకర్తలు తప్పు చేస్తే చట్టప్రకారం శిక్షించాలి తప్ప.. జన సైనికులు ఎవరూ చట్టాన్ని చేతుల్లోకి తీసుకోకూడదని సూచించారు. జనసేన అధ్యక్షుడు పవన్‌ కల్యాణ్‌ ఇప్పటికే పార్టీ శ్రేణులకు పలు దఫాలుగా ఈ విషయాన్ని చెప్పారని ఆయన వివరించారు. చట్టాన్ని చేతుల్లోకి తీసుకుంటే కేసుల్లో ఇరుక్కుంటారని.. తర్వాత ఇబ్బందులు పడాల్సి వస్తుందని గురువారం ఒక ప్రకటనలో బాలశౌరి పేర్కొన్నారు. వైకాపా అరాచకాలకు చట్టపరిధిలోనే సమాధానం చెప్పాలని.. ఎక్కడైనా తప్పులు చేస్తే పోలీసులకు ఫిర్యాదు చేయాలని సూచించారు. 

బాలశౌరితో పరిమళ్‌ నత్వాని భేటీ

రాజ్యసభ సభ్యుడు పరిమళ్‌ నత్వాని గురువారం దిల్లీలో బాలశౌరితో భేటీ అయ్యారు. జనసేన పార్టీ తరపున మచిలీపట్నం నుంచి ఎంపీగా ఎన్నికైన బాలశౌరికి అభినందనలు తెలియజేసినట్లు ‘ఎక్స్‌’లో పోస్టు చేశారు. రాష్ట్ర్రాభివృద్ధికి సంబంధించిన అంశాలపై చర్చించారు.