సలహాదారుల సేవలకు మంగళం

ఈనాడు, అమరావతి: రాష్ట్రంలో సలహాదారుల సేవలకు ప్రభుత్వం మంగళం పాడింది. ముఖ్యమంత్రి ముఖ్య సలహాదారులు, సలహాదారులు, ప్రధాన సలహాదారులను పదవుల నుంచి తొలగిస్తూ సాధారణ పరిపాలన శాఖ ముఖ్య కార్యదర్శి ఎస్‌.సురేశ్‌కుమార్‌ గురువారం ఉత్తర్వులిచ్చారు. ముఖ్యమంత్రి, మంత్రుల రాజీనామాల నేపథ్యంలో శాఖల వారీగా నియమించుకున్న సలహాదారుల సేవలను నిలిపేయాలని ఆదేశించారు. ఈ నెల 4 నుంచి ఈ నిర్ణయం అమల్లోకి వస్తుందని పేర్కొన్నారు. వైకాపా పాలనలో సజ్జల రామకృష్ణారెడ్డి సహా వివిధ శాఖల పరిధిలో సుమారు 40 మందికి పైగా సలహాదారులను నియమించారు. వారిచ్చిన సలహాలేమిటో తెలియదు కానీ.. జీతాలు, ఇతర రూపాల్లో ప్రతినెలా రూ.లక్షల్లో చెల్లిస్తున్నారు. ఇప్పుడు వీరందరి సేవలను నిలిపేస్తూ ప్రభుత్వం ఆదేశాలిచ్చింది.