తెదేపాకు ఓటేశారని.. నిత్యావసరాల నిలిపివేత

బెస్తరపల్లిలో నిత్యావసరాల కోసం పడిగాపులు కాస్తున్న లబ్ధిదారులు

కుందుర్పి, న్యూస్‌టుడే: అనంతపురం జిల్లా కుందుర్పి మండలం బెస్తరపల్లి రేషన్‌ దుకాణంలో నిత్యావసరాల పంపిణీలో డీలర్‌ తీవ్రంగా ఇబ్బంది పెడుతున్నారని లబ్ధిదారులు ఆదివారం దుకాణం ఎదుట ఆందోళనకు దిగారు. గ్రామంలో రెండు చౌకధరల దుకాణాలు ఉన్నాయి. వైకాపా గ్రామ నాయకుడైన ఓ డీలర్‌ ‘వైకాపా ప్రభుత్వంలో కార్డుదారులంతా అనేక ప్రయోజనాలు పొందారు. వైకాపాకు ఓట్లు వేయకుండా పార్టీని ఓడించి మోసం చేశారు’ అంటూ లబ్ధిదారులకు సరకులు పంపిణీ చేయలేదు. తనకు తీరిక ఉన్నప్పుడే ఇస్తానని, అప్పుడు వచ్చి తీసుకోవాలని దబాయిస్తూ తీవ్ర జాప్యం చేస్తున్నారని గ్రామస్థులు ఆరోపిస్తున్నారు. అధికారులు చర్యలు తీసుకుని తమకు నిత్యావసరాలు అందేలా చర్యలు తీసుకోవాలని లబ్ధిదారులు కోరుతున్నారు.