తాళాలు తెరిచే వరకు కార్యాలయాలకు రావొద్దు

గనులు, ఏపీఎండీసీ అధికారులు, సిబ్బందికి ఆదేశం

ఈనాడు-అమరావతి: గనులశాఖ సంచాలకుడి కార్యాలయం, ఏపీ ఖనిజాభివృద్ధి సంస్థ (ఏపీఎండీసీ) కార్యాలయాలు ఇంకా ఏపీఎస్పీ పోలీసుల ఆధీనంలోనే ఉన్నాయి. శుక్రవారం అర్ధరాత్రి తర్వాత ఈ రెండు కార్యాలయాలకు పోలీసులు తాళాలు వేసి, తమ ఆధీనంలోకి తీసుకున్న సంగతి తెలిసిందే. అయితే వాటి తాళాలు సోమవారం కూడా తెరుచుకోలేదు. ఈ రెండింటిలో పనిచేసే అధికారులు, సిబ్బంది సోమవారం విధులకు హాజరయ్యేందుకు వెళ్లగా.. వారిని పోలీసులు కార్యాలయాల్లోకి అనుమతించలేదు. దీంతో గనులశాఖ, ఏపీఎండీసీ అధికారులు ఈ విషయాన్ని వాటి ఇన్‌ఛార్జి సంచాలకులు, ఎండీ అయిన యువరాజ్‌ దృష్టికి తీసుకెళ్లారు. 12వ తేదీన కొత్త ప్రభుత్వం ఏర్పడ్డాక, వారిచ్చే ఆదేశాల ప్రకారం నడుచుకుందామని.. అప్పటి వరకు కార్యాలయాలకు వెళ్లొద్దని ఆయన చెప్పినట్లు తెలిసింది.