Death: తల్లడిల్లిన కన్న పేగు

పురిటి బిడ్డ మరణ వార్త విని ఆసుపత్రిలోనే బాలింత కన్నుమూత

రమ్యప్రియ 

పాడేరు, పెదబయలు గ్రామీణం, న్యూస్‌టుడే: తొమ్మిది నెలల పాటు తన కడుపులో పెరిగిన శిశువు మృతి చెందడాన్ని ఆ కన్నతల్లి తట్టుకోలేకపోయింది. ఆ వార్త విన్న వెంటనే అపస్మారక స్థితికి చేరుకుని వెంటనే తానూ కన్నుమూసింది. ఈ హృదయ విదారక ఘటన అల్లూరి సీతారామరాజు జిల్లాలో చోటు చేసుకుంది. బంధువుల కథనం ప్రకారం.. హుకుంపేట మండలం అడ్డుమండకు చెందిన రమ్యప్రియ (25) పెదబయలు మండలం గోమంగి సచివాలయ పరిధిలో మహిళా పోలీసుగా విధులు నిర్వర్తిస్తున్నారు. గర్భిణి అయిన ఆమెకు నెలలు నిండి పురిటినొప్పులు ఎక్కువ కావడంతో సోమవారం వేకువజామున 4 గంటల సమయంలో కుటుంబసభ్యులు పాడేరు జిల్లా ఆసుపత్రిలో చేర్చారు. నొప్పులు ఎక్కువ కావడంతో విధుల్లో ఉన్న నర్సులు శస్త్రచికిత్స చేసి శిశువును బయటకు తీశారు. అప్పటికే ఆ శిశువు మృతి చెందింది. స్పృహ కోల్పోయిన రమ్యప్రియను వేరొక గదిలో ఉంచగా.. కొద్ది గంటలకు బిడ్డ మరణవార్త ఆమె చెవిలో పడింది. దీంతో ఆమె ఒక్కసారిగా షాక్‌తో కేకలు వేసి కుప్పకూలి మృతి చెందారు. తాము రాగానే నర్సులు వైద్యులకు సమాచారం ఇచ్చారని, వారు వచ్చేసరికే జరగాల్సిన నష్టం జరిగిపోయిందని బంధువులు చెబుతున్నారు.