Vijayasai Reddy: వైకాపా ఎంపీ విజయసాయిరెడ్డికి షాక్‌..

రాజ్యసభ ప్యానల్‌ వైస్‌ఛైర్మన్ల జాబితాలో పేరు తొలగింపు

ఈనాడు, దిల్లీ: రాజ్యసభ ప్యానల్‌ వైస్‌ఛైర్మన్ల జాబితా నుంచి వైకాపా ఎంపీ విజయసాయిరెడ్డి పేరు తొలగించారు. ఈ నెల 5వ తేదీన మొత్తం 8 మంది పేర్లతో కూడిన ప్యానల్‌ వైస్‌ఛైర్మన్ల జాబితాను రాజ్యసభ విడుదల చేసింది. అందులో భువనేశ్వర్‌ కలితా, ఎల్‌.హనుమంతయ్య, తిరుచ్చి శివ, సుఖేందు శేఖర్‌రాయ్‌, సస్మిత్‌పాత్ర, సరోజ్‌పాండే, సురేంద్రసింగ్‌ నాగర్‌, వి.విజయసాయిరెడ్డి పేర్లు ఉన్నాయి. ఈ అవకాశం కల్పించిన రాజ్యసభ ఛైర్మన్‌ జగదీప్‌ ధన్‌ఖడ్‌కు హృదయపూర్వక ధన్యవాదాలు తెలుపుతూ విజయసాయిరెడ్డి అదేరోజు జాబితాను జత చేస్తూ ట్వీట్‌ కూడా చేశారు. తాను సభ్యులందరికీ శుభాకాంక్షలు తెలుపుతున్నానని, సభా నిర్వహణలో పూర్తిస్థాయిలో సహకారం అందిస్తానని హామీ ఇస్తున్నానని పేర్కొన్నారు. అయితే బుధవారం మధ్యాహ్నం 2.43 గంటల సమయంలో నూతన ఛైర్మన్‌ జగదీప్‌ ధన్‌ఖడ్‌ మాట్లాడుతూ ప్యానల్‌ వైస్‌ఛైర్మన్ల జాబితాను పునరుద్ధరించామని పేర్కొంటూ ఏడుగురి పేర్లు మాత్రమే చదివారు. విజయసాయిరెడ్డి పేరు ఆయన నోటి నుంచి రాలేదు. బుధవారం నమోదైన రాజ్యసభ రికార్డుల్లోనూ ఆ ఏడుగురి పేర్లు మాత్రమే ఉన్నాయి. అలాగే రాజ్యసభ సచివాలయం బీఏసీకి సభ్యులను ఆహ్వానిస్తూ 5వ తేదీన పంపిన నోటీసులోనూ ప్యానల్‌ వైస్‌ఛైర్మన్ల జాబితాలో ఏడుగురి పేర్లు తప్పితే విజయసాయిరెడ్డి పేరు కనిపించలేదు. అందులో విజయసాయిరెడ్డిని బీఏసీ సభ్యుడిగా మాత్రమే పేర్కొన్నారు. బుధవారం రాత్రి అప్‌డేట్‌ చేసిన రాజ్యసభ వెబ్‌సైట్‌లో ఉన్న జాబితాలోనూ ఆయన పేరు లేదు.