అనిల్‌ అంబానీ కంపెనీల వల్ల యెస్‌ బ్యాంక్‌కు రూ.2,700 కోట్ల నష్టం

సీబీఐ ఛార్జ్‌షీట్‌లో వెల్లడి

ముంబయి: అనిల్‌ అంబానీకి చెందిన ఆర్థిక కంపెనీల్లో పెట్టుబడులు పెట్టాలని యెస్‌ బ్యాంక్‌ సహ వ్యవస్థాపకుడు రాణా కపూర్‌ తీసుకున్న ‘ఏకపక్ష’ నిర్ణయం కారణంగా బ్యాంక్‌కు రూ.2,700 కోట్లకు పైగా నష్టం వచ్చిందని కేంద్ర దర్యాప్తు సంస్థ సీబీఐ తన ఛార్జ్‌షీట్‌లో పేర్కొంది. యెస్‌ బ్యాంక్, అనిల్‌ అంబానీ గ్రూప్‌ సంస్థల మధ్య మోసపూరిత లావాదేవీలకు సంబంధించిన కేసు ఛార్జ్‌షీట్‌లో ఈ అంశాలను వెల్లడించింది. రుణాలు, పెట్టుబడులకు సంబంధించిన నేరపూరిత కుట్ర, మోసం, అవినీతి జరిగిందని ఆరోపిస్తూ సీబీఐ గత నెలలో అనిల్‌ అంబానీ, రాణా కపూర్, ఆయన కుటుంబ సభ్యులతో సహా 13 మంది వ్యక్తులు, సంస్థలపై సీబీఐ ఛార్జ్‌షీట్‌ దాఖలు చేసింది. ఈ కేసులో అనిల్‌ అంబానీ కుమారుడు, అప్పటి రిలయన్స్‌ క్యాపిటల్‌ ఎగ్జిక్యూటివ్‌ డైరెక్టర్‌ అన్మోల్‌ అంబానీ పాత్రపై దర్యాప్తు కొనసాగుతుందని సీబీఐ తెలిపింది. యెస్‌ బ్యాంక్‌ చీఫ్‌ విజిలెన్స్‌ అధికారి దాఖలు చేసిన రెండు వేర్వేరు ఫిర్యాదుల ఆధారంగా ఈ కేసు నమోదైంది. సీబీఐ ఛార్జ్‌షీట్‌ ప్రకారం.. యెస్‌ బ్యాంక్‌ ఎండీ, సీఈఓగా రాణా కపూర్‌ ఉన్నప్పుడు, 2017-19 మధ్య అనిల్‌ ధీరూభాయ్‌ అంబానీ (ఏడీఏ) గ్రూప్‌నకు చెందిన ఆర్థిక కంపెనీల్లో రూ.5010 కోట్ల పెట్టుబడులను బ్యాంక్‌ పెట్టింది. ఈ పెట్టుబడులతో లభించిన షేర్ల విలువలు పడిపోవడంతో, ఆ మొత్తాన్ని తిరిగి బ్యాంక్‌ పొందలేకపోయింది. ఫలితంగా రూ.2,796.77 కోట్ల నష్టాన్ని చవిచూసింది. కొన్ని ఏడీఏ సంస్థలు షెల్‌ కంపెనీలుగా గుర్తించినట్లు ఛార్జ్‌షీట్‌లో పేర్కొన్నారు.