3 రోజుల్లోనే జీఎస్‌టీ రిజిస్ట్రేషన్‌

చిన్న, మధ్య స్థాయి వ్యాపారులకు ప్రత్యేకం

దిల్లీ: చిన్న, మధ్య స్థాయి వ్యాపారుల కోసం సరళీకృత జీఎస్‌టీ రిజిస్ట్రేషన్‌ విధానాన్ని జీఎస్‌టీ విభాగం అందుబాటులోకి తీసుకొచ్చింది. శనివారం (నవంబరు 1) నుంచే ఇది అమల్లోకి వచ్చింది. దీని ద్వారా చిన్న, తక్కువ రిస్క్‌ ఉన్న వ్యాపార సంస్థలు 3 రోజుల్లోనే జీఎస్‌టీ రిజిస్ట్రేషన్‌ పొందొచ్చు. 

వీరు అర్హులు: నెలకు రూ.2.5 లక్షల్లోపు అవుట్‌పుట్‌ టాక్స్‌ లయబులిటీ (సీజీఎస్‌టీ, ఎస్‌జీఎస్‌టీ/యూటీజీఎస్‌టీ, ఐజీఎస్‌టీ కలిపి) ఉందని స్వీయ మదింపు పత్రాన్ని ఇచ్చే దరఖాస్తుదార్లకు ఈ పథకం వర్తిస్తుంది. జీఎస్‌టీ వ్యవస్థ సైతం డేటా అనలిటిక్స్‌ ద్వారా దీనికి ఎవరు అర్హులో గుర్తిస్తుంది. ఈ పథకం ద్వారా 96% మంది కొత్త దరఖాస్తుదార్లకు ప్రయోజనం కలుగుతుందని ఆర్థిక మంత్రి నిర్మలా సీతారామన్‌ అన్నారు.