Sam Altman: ఏడేళ్ల క్రితం బుక్‌ చేసిన కారు ఇంకా రాలేదు: టెస్లాపై శామ్‌ ఆల్టమన్‌ పోస్ట్

ఇంటర్నెట్‌డెస్క్‌: తాను ఏడేళ్ల క్రితం టెస్లా కారును బుక్‌ చేసుకున్నానని, అది ఇంకా డెలివరీ కాలేదని ఓపెన్‌ఏఐ సీఈఓ శామ్‌ ఆల్టమన్‌ (Sam Altman) వెల్లడించారు. ఈ మేరకు ఆయన సోషల్ మీడియా వేదికగా పోస్టు పెట్టారు. బుకింగ్ అప్పుడు చెల్లించిన 50వేల డాలర్లను రీఫండ్ చేయాలని కోరుతూ కొన్ని ఈమెయిల్ స్క్రీన్‌షాట్లను షేర్ చేశారు.

ఆల్టమన్ 2018లో టెస్లా (Tesla) కారును బుక్ చేసుకున్నారు. తొలి స్క్రీన్‌షాట్‌ ఆ విషయాన్ని నిర్ధరిస్తోంది. ఏడేళ్ల తర్వాత కూడా కారు డెలివరీ కాకపోవడంతో బుకింగ్ కోసం ఇచ్చిన 50వేల డాలర్లను రీఫండ్ చేయమంటూ టెస్లా సంస్థకు ఈ సంవత్సరం ఆయన మెయిల్ చేశారు. ఆ వివరాలను తన పోస్టులో షేర్ చేశారు. బుకింగ్ నిర్ధరించిన మెయిల్ ఇప్పుడు అందుబాటులో లేదనే సమాధానం వచ్చిందని ఆయన రాసుకొచ్చారు. ‘‘కారు కోసం నేను ఎంతో ఉత్సాహంగా ఎదురుచూశాను. ఆలస్యాలను అర్థం చేసుకోగలను. కానీ 7.5 సంవత్సరాలు అంటే చాలా ఎక్కువ’’ అని అసహనం వ్యక్తంచేశారు. ఇది వెంటనే వైరల్‌గా మారింది.

ఏ కారు మోడల్‌ను బుక్ చేశారో మాత్రం ఆల్టమన్ వెల్లడించలేదు. అయితే అది టెస్లా రోడ్‌స్టర్ కావొచ్చని తెలుస్తోంది. ఈ కారు మోడల్‌ ఉత్పత్తి 2020లో ప్రారంభం కావాల్సి ఉంది. కానీ తర్వాత చాలాసార్లు వాయిదా పడింది. ‘‘ఆ వెర్షన్‌పై పనిచేస్తున్నాం’’ అని 2024లో టెస్లా సీఈఓ ఎలాన్‌ మస్క్ తన ఇన్వెస్టర్లకు తెలిపారు. ఈ ఏడాది చివర్లో ఈ మోడల్ విడుదల కావొచ్చని తెలుస్తోంది. కాగా.. ఆల్టమన్‌ పోస్ట్‌పై టెస్లా నుంచి స్పందన రావాల్సి ఉంది.