ఆయిల్‌ ట్యాంకర్‌ను ఢీకొట్టిన కారు.. 10 మంది దుర్మరణం

అహ్మదాబాద్‌: గుజరాత్‌లో ఘోర రోడ్డు ప్రమాదం జరిగింది. అహ్మదాబాద్‌- వడోదర ఎక్స్‌ప్రెస్‌వేపై ఆగివున్న ఆయిల్‌ ట్యాంకర్‌ను వేగంగా వెళ్తున్న కారు ఢీకొట్టింది. ఈ ఘటనలో 10 మంది దుర్మరణం చెందినట్లు పోలీసులు వెల్లడించారు. కారు వడోదర నుంచి అహ్మదాబాద్‌ వైపు వెళ్తుండగా  ఖేదా జిల్లాలోని నాడియాడ్‌ వద్ద ఈ దుర్ఘటన జరిగినట్లు తెలిపారు. రోడ్డు పక్కన నిలిపిఉన్న ట్యాంకర్‌ను వేగంగా ఢీకొట్టడంతో ఎనిమిది మంది అక్కడికక్కడే ప్రాణాలు కోల్పోగా..  ఇద్దరికి తీవ్ర గాయాలయ్యాయి. వారిని హుటాహుటిన సమీపంలోని ఆస్పత్రికి తరలించగా.. చికిత్స పొందుతూ ఇద్దరూ ప్రాణాలు విడిచినట్లు పోలీసులు వివరించారు. ఈ ఘటనపై నాడియాడ్‌ ఎమ్మెల్యే పంకజ్‌ దేశాయ్ స్పందించారు.  సాంకేతికలోపం కారణంగా ట్రక్కు ఎక్స్‌ప్రెస్‌వే ఎడమ లేన్‌లో ఆగిపోయి ఉండొచ్చని కారు డ్రైవర్‌కు బ్రేకులు వేసేందుకు తగినంత సమయం లభించకపోవడంతో ఢీకొట్టినట్లుగా ఉందని పేర్కొన్నారు. ఈ ప్రమాదంలో  కారు నుజ్జునుజ్జయింది.