Abdullapurmet: నవీన్‌ హత్య కేసు.. జైలు నుంచి నిహారిక విడుదల

రంగారెడ్డి: అబ్దుల్లాపూర్‌మెట్‌ పరిధిలో జరిగిన బీటెక్‌ విద్యార్థి నవీన్‌ హత్య కేసులో ప్రధాన నిందితుడు హరిహరకృష్ణ స్నేహితురాలు నిహారికకు బెయిల్‌ మంజూరైంది. ఈకేసులో ఏ3గా ఉన్న ఆమెకు రంగారెడ్డి జిల్లా కోర్టు బెయిల్‌ మంజూరు చేసింది. దీంతో నిహారిక జైలు నుంచి విడుదలైంది. 

నవీన్‌ హత్య కేసులో ప్రధాన నిందితుడు హరిహరకృష్ణకు సహకరించినందుకు అతడి స్నేహితుడు హసన్‌, ప్రేమించిన యువతి నిహారికను పోలీసులు నిందితులుగా చేర్చి మార్చి 6వ తేదీన అరెస్టు చేసిన విషయం తెలిసిందే. హత్య గురించి తనకు హరిహరకృష్ణ చెప్పినా పోలీసులు సహా ఎవరికీ సమాచారం ఇవ్వకపోవడం.. హత్యానంతరం ఇద్దరి మధ్య జరిగిన ఫోన్‌ సంభాషణలు, సందేశాలను తొలగించి సాక్ష్యాధారాలను చెరిపేసే ప్రయత్నం చేసినందుకు యువతిని నిందితురాలిగా చేర్చి అరెస్టు చేశారు. అనంతరం నిందితులిద్దర్నీ హయత్‌నగర్‌ కోర్టులో హాజరుపర్చగా న్యాయమూర్తి 14 రోజుల జ్యుడిషియల్‌ రిమాండ్‌ విధించారు. ఇటీవల నిహారిక బెయిల్‌ కోసం దరఖాస్తు చేసుకుంది. శనివారం ఆమెకు కోర్టు బెయిల్‌ మంజూరు చేయడంతో జైలు నుంచి ఆదివారం విడుదలైంది.