ACB: ఏసీబీ వలలో చిల్లకల్లు ఎస్సై దుర్గా ప్రసాద్‌

పెనుగంచిప్రోలు: ఎన్టీఆర్‌ జిల్లా చిలకల్లు పోలీస్‌ స్టేషన్‌పై ఏసీబీ అధికారులు సోమవారం దాడి చేసి రూ.3 లక్షల నగదు స్వాధీనం చేసుకున్నారు. వివరాల్లోకి వెళితే.. చిల్లకల్లు పోలీస్‌ స్టేషన్‌లో గతంలో నమోదైన అక్రమ బొగ్గు రవాణా కేసు పెండింగ్‌లో ఉంది. ఈ కేసుపై గత నెల రోజులుగా విచారణ జరుగుతోంది. ఈ నేపథ్యంలో బొగ్గు అక్రమ రవాణాకు పాల్పడిన వ్యక్తులు కేసు నుంచి తప్పించుకునేందుకు ఎస్సై దుర్గా ప్రసాద్‌కు రూ. 5 లక్షల లంచం ఆశ చూపారు. సోమవారం రాత్రి దీనికి సంబంధించిన రూ. 3 లక్షల నగదును చిల్లకల్లు టోల్‌గేటు వద్ద సదరు వ్యక్తుల నుంచి కానిస్టేబుల్ సునీల్‌ తీసుకుంటుండగా ఏసీబీ అధికారులు మెరుపు దాడి చేసి పట్టుకున్నారు. కానిస్టేబుల్‌ను అదుపులోకి తీసుకొని నేరుగా స్టేషన్‌కు వెళ్లారు. లంచం గురించి ఎస్సైని విచారించి నివేదిక తీసుకున్నారు. ఉన్నతాధికారులు పోలీస్‌ స్టేషన్‌కు తరలివచ్చారు. ఏసీబీ అధికారులు తనిఖీలు చేపట్టారు. అంతకుముందే మరో రూ.2 లక్షలను ఎస్సైకి అందజేసినట్లు బాధితులు చెబుతున్నారు.