Rave Party: సినీనటి హేమకు మరోసారి నోటీసులు

బెంగళూరు (శివాజీనగర), న్యూస్‌టుడే: బెంగళూరు నగర శివారులోని జీఆర్‌ ఫాంహౌస్‌లో నిర్వహించిన రేవ్‌ పార్టీలో పాల్గొని మాదక ద్రవ్యాలు తీసుకున్నట్లు ఆరోపణలు ఎదుర్కొంటున్న తెలుగు సినీనటి హేమకు సీసీబీ పోలీసులు రెండోసారి నోటీసులు జారీ చేశారు. గత సోమవారం తమ ఎదుట విచారణకు హాజరుకావాలని పోలీసులు మొదటిసారి నోటీసులు ఇచ్చారు. తనకు జ్వరంగా ఉందని, విచారణకు హాజరయ్యేందుకు ఒక వారం సమయం కావాలని ఆమె కోరారు. దీంతో జూన్‌ 1న విచారణకు రావాలని బుధవారం మరో నోటీసును ఆమెకు పంపించారు. ఆంధ్రప్రదేశ్‌ మంత్రి కాకాణి గోవర్ధన్‌రెడ్డి పేరిట స్టిక్కర్‌ ఉన్న కారులో వచ్చిన వ్యక్తులకూ నోటీసులు జారీ చేస్తామని పోలీసులు తెలిపారు.