Hyderabad: మొబైల్‌ వాడకంపై తల్లి మందలింపు.. కుమార్తె ఆత్మహత్య

కుత్బుల్లాపూర్‌: సెల్‌ఫోన్‌ ఎక్కువగా వాడొద్దని తల్లి మందలించిందని ఓ కూతురు ఉరేసుకొని ఆత్మహత్యకు పాల్పడింది. ఈ ఘటన హైదరాబాద్‌ పేట్‌ బషీరాబాద్‌ పోలీస్టేషన్‌ పరిధిలో చోటు చేసుకుంది. వివరాల్లోకి వెళ్తే.. ధూళపల్లి గ్రామానికి చెందిన మూర్తి కుమార్తె సాధన (17) మొబైల్‌ ఎక్కువగా వాడుతోందని ఆమె తల్లి మందలించింది. దీంతో ఆదివారం రాత్రి 8 గంటల ప్రాంతంలో  గదిలోకి వెళ్లిన ఆమె.. ఉరివేసుకొని ఆత్మహత్యకు పాల్పడింది. తల్లిదండ్రులు గమనించి దగ్గర్లోని ఆస్పత్రికి తరలిచంగా అప్పటికే మృతి చెందినట్లు వైద్యులు వెల్లడించారు. తల్లిదండ్రుల ఫిర్యాదు మేరకు కేసు నమోదు చేసుకున్న పేట్‌ బషీరాబాద్‌ పోలీసులు దర్యాప్తు చేస్తున్నారు.