రైల్లో వివాదం.. ఇద్దరిపై చాకుతో దాడి.. పరిస్థితి విషమం

కటక్‌: గాంధీ ధామ్‌- పూరి ధామ్‌ రైళ్లో ఒకే బోగీలో ప్రయాణిస్తున్న వారి మధ్య గురువారం రాత్రి ఘర్షణలు చోటు చేసుకున్నాయి. ఈ కొట్లాటలో శ్రీకాకుళం జిల్లాకు చెందిన బి. చంద్రశేఖర్‌రావు, అతడి స్నేహితుడు బ్రహ్మపురానికి చెందిన నాగేశ్వర బెహరాకు తీవ్ర గాయాలయ్యాయి. వారిద్దరినీ ఒడిశాలోని బలంగిర్‌ జిల్లా టిటిలాగాడ్‌ రైల్లే స్టేషన్‌లో దింపేసి.. రైల్వే పోలీసులు ఆస్పత్రికి తరలించారు. ఈ స్నేహితులిద్దరూ రైల్లో ఏదో విషయంపై ఒడిశాలోని గంజాం జిల్లాకు చెందిన దంపతులు చాగల నాయక్‌, వినతి నాయక్‌లోమ గొడవపడ్డారు. దీంతో దంపతులిద్దరూ ఆగ్రహంతో వారి దగ్గరున్న చాకుతో వారిపై దాడికి పాల్పడ్డారు. దీంతో వారిద్దరి గొంతులపై తీవ్ర గాయాలయ్యాయి. బోగీలో ఉన్నవారు పోలీసులకు సమాచారం అందించడంతో క్షతగాత్రులను తొలుత టిటిలాగాడ్‌లోని స్థానిక ఆసుపత్రిలో చేర్చారు. పరిస్థితి ఆందోళనకరంగా మారడంతో బలంగిర్ భీమా బోయి ప్రభుత్వ వైద్య కళాశాల ఆసుపత్రికి తరలించారు.