Chhattisgarh: ఛత్తీస్‌గఢ్‌లో ఘాతుకం.. పోలీసును నరికి చంపిన దుండగులు

రాయ్‌పుర్: నక్సల్స్ ప్రభావిత ప్రాంతమైన ఛత్తీస్‌గఢ్‌ (Chhattisgarh)లోని సుక్మాలో ఘోర ఘటన చోటుచేసుకుంది. కొందరు గుర్తుతెలియని వ్యక్తులు ఒక కానిస్టేబుల్‌ను హత్య చేశారని ఉన్నతాధికారులు వెల్లడించారు.

మృతుడి పేరు సోడి లక్ష్మణ్‌ అని అధికారులు వెల్లడించారు. ఆదివారం అర్ధరాత్రి దాటిన తర్వాత ఈ దాడి జరిగిందని చెప్పారు. గాదిరాస్ గ్రామంలో జరిగిన జాతర చూసేందుకు వెళ్లిన కానిస్టేబుల్‌పై.. కొందరు వ్యక్తులు పదునైన ఆయుధాలతో దాడి చేశారు. ఈ సమాచారం అందుకున్న పోలీసులు వెంటనే ఘటనా స్థలానికి చేరుకోగా.. అప్పటికే అతడు ప్రాణాలు కోల్పోయినట్లు గుర్తించారు. మృతదేహాన్ని పోస్టుమార్టం నిమిత్తం ఆసుపత్రికి తరలించారు. ‘‘నక్సలైట్ల బృందం ఈ ఘటనకు పాల్పడి ఉంటుందని ప్రాథమికంగా అంచనా వేస్తున్నాం. అయితే ప్రస్తుతం అన్ని కోణాల్లో దర్యాప్తు చేన్నాం. వ్యక్తిగత శత్రుత్వం ఏమైనా కారణమా..? అన్న కోణంలో కూడా విచారిస్తున్నాం’’ అని వెల్లడించారు. నిందితుల కోసం గాలిస్తున్నట్లు చెప్పారు.