East Godavari: భర్త మృతదేహం పక్కనే ప్రాణాలు విడిచిన భార్య

గోకవరం: అనారోగ్యంతో భర్త మృతి చెందగా .. మనోవేదనతో భార్య కూడా ప్రాణాలు విడిచింది. కొన్ని గంటల వ్యవధిలోనే ఆ వృద్ధ దంపతులిద్దరూ మృతి చెందిన విషాద ఘటన తూర్పు గోదావరి జిల్లా గోకవరం మండలం తంటికొండ గ్రామంలో చోటు చేసుకుంది.  గ్రామానికి చెందిన కోసూరి సత్యనారాయణ (77) వడ్రంగి పని చేస్తూ జీవనం సాగిస్తున్నాడు. కుమారుడు, కుమార్తెకు వివాహాలు జరిపించారు. గత కొంత కాలంగా అనారోగ్య సమస్యలతో బాధపడుతున్న సత్యనారాయణ ఆదివారం తెల్లవారుజూమున మృతి చెందాడు. దీంతో తీవ్ర మనోవేదనకు గురైన ఆయన భార్య వరలక్ష్మి (65) భర్త మృతదేహం పక్కనే ఏడుస్తూ ప్రాణాలు విడిచింది. ఎంతో అన్యోన్యంగా జీవించిన భార్యాభర్తలు ఒకే సారి మృతి చెందడంతో గ్రామంలో విషాదఛాయలు అలముకున్నాయి.