Cyber Crime: మనీలాండరింగ్‌ కేసులో ఇరుక్కున్నారు.. రూ. 60లక్షలు చెల్లించండి!

సైబర్‌ నేరగాళ్ల కొత్త పంథా

హైదరాబాద్‌:  సైబర్‌ నేరగాళ్లు రోజుకో కొత్త పంథాలో ప్రజలను బురిడీ కొట్టిస్తున్నారు. అప్రమత్తంగా ఉండాలని పోలీసులు హెచ్చరిస్తున్నా కొంతమంది వీరి ఉచ్చులో పడి జేబులు గుల్ల చేసుకుంటున్నారు. తాజాగా హైదరాబాద్‌కు చెందిన ఓ యువతి సైబర్‌ నేరగాళ్ల చేతిలో మోసపోయింది. మహారాష్ట్ర పోలీసులమంటూ సైబర్‌ నేరగాళ్లు ఆమెకు ఫోన్‌ చేశారు. మనీలాండరింగ్‌ కేసులో మీ పేరుందని చెప్పి.. స్కైప్‌ ద్వారా వీడియో కాల్‌లో మాట్లాడారు. కేసు నుంచి తప్పించుకోవాలంటే తాము చెప్పిన ఖాతాకు రూ.60లక్షలు నగదు బదిలీ చేయాలని చెప్పారు. వాళ్లు చెప్పినట్లే చేసిన తర్వాత మోసపోయినట్లు గ్రహించిన బాధితురాలు.. వెంటనే 1930కి ఫోన్‌ చేసి ఫిర్యాదు చేసింది. సైబర్‌ సెక్యూరిటీ బ్యూరో అధికారులు స్పందించి మొత్తం నగదును ఫ్రీజ్‌ చేశారు. వేగంగా స్పందించిన కాల్‌ సెంటర్‌ సిబ్బందిని అదనపు సైబర్‌ సెక్యూరిటీ బ్యూరో డైరెక్టర్‌ శిఖా గోయల్‌ అభినందించారు.