Hyderabad: రాజేంద్రనగర్‌లో భారీ అగ్ని ప్రమాదం.. రూ.2కోట్ల ఆస్తి నష్టం

హైదరాబాద్‌: రంగారెడ్డి జిల్లా రాజేంద్రనగర్‌ గగన్‌ పహాడ్‌ పారిశ్రామిక వాడలో బుధవారం సాయంత్రం భారీ అగ్ని ప్రమాదం సంభవించింది. థర్మాకోల్‌ పరిశ్రమలో ఒక్కసారిగా మంటలు చెలరేగడంతో భారీగా ఆస్తినష్టం వాటిల్లింది. వెల్డింగ్‌ పనులు చేస్తుండగా.. విద్యుత్‌ తీగల నుంచి మంటలు అంటుకుని ప్రమాదం జరిగినట్టు సమాచారం. ఈ ఘటనలో ఎలాంటి ప్రాణ నష్టం లేదని, రూ.2కోట్ల వరకు ఆస్తి నష్టం జరిగి ఉండొచ్చని అంచనా వేస్తున్నారు. అగ్నిమాపక సిబ్బంది నాలుగు ఫైరింజన్లతో మంటలను ఆర్పివేయడంతో స్థానికులు ఊపిరిపీల్చుకున్నారు. ఘటనపై శంషాబాద్‌ పోలీసులు కేసు నమోదు చేసి దర్యాప్తు చేస్తున్నారు.