Chennai: చెన్నై విమానాశ్రయంలో భారీగా విదేశీ కరెన్సీ స్వాధీనం

బెంగళూరు: చెన్నై విమానాశ్రయంలో (Chennai Airport) కస్టమ్స్‌ అధికారులు భారీ మొత్తంలో విదేశీ కరెన్సీని (Foreign Currency) స్వాధీనం చేసుకున్నారు. చెన్నై నుంచి సింగపూర్ వెళ్లేందుకు ఎయిర్‌పోర్టుకు వచ్చిన ప్రయాణికుడి లగేజీని పరీక్షించగా 2,83,500 అమెరికా డాలర్లు, 5,00,000 సౌదీ రియల్స్‌ ఉన్నట్లు గుర్తించి ఆ మొత్తాన్ని స్వాధీనం చేసుకున్నారు. భారత కరెన్సీలో దాని విలువ దాదాపు రూ.3.37 కోట్లకు పైగా ఉంటుందని అధికారులు అంచనా వేస్తున్నారు. సదరు ప్రయాణికుడిపై కేసు నమోదు చేసిన కస్టమ్స్‌ అధికారులు అతడిని రిమాండ్‌కు తరలించారు. అంతపెద్ద మొత్తంలో విదేశీ కరెన్సీ ఆయనకు ఎలా చేరిందన్న అంశంపై ఆరా తీస్తున్నారు. ఇతడి వెనుక ఇంకెవరైనా ఉన్నారా? అనే కోణంలోనూ దర్యాప్తు ప్రారంభించినట్లు కస్టమ్స్‌ అధికారులు వెల్లడించారు.