నాసా పేరుతో మోసం.. రూ.6 కోట్లు స్వాహా

ముంబయి: అమెరికా అంతరిక్ష పరిశోధన సంస్థ- నాసా పేరుతో కొందరు దుండగులు.. 100 మందికి టోకరా వేసి రూ.ఆరు కోట్లు దోచుకున్నారు. మహారాష్ట్రలోని కొంతమంది వ్యక్తులు నాసా అంతరిక్ష పరిశోధన సంస్థ పేరుతో రైస్‌పుల్లర్‌ యంత్రంపై పెట్టుబడులు పెడితే లాభాలొస్తాయని బాధితులకు తెలిపారు. నాసా శాస్త్రవేత్తలు ఈ యంత్రంపై పరిశోధనలు చేస్తున్నారంటూ.. ప్రస్తుతం ఈ లోహ కుండకు మంచి డిమాండ్‌ ఉందని వారితో నిందితులు చెప్పారు. దీంతోపాటు కొన్ని నకిలీ పత్రాలను చూపించారు. వారు చెప్పింది నిజమేనని భావించిన బాధితులు వారికి నగదును ముట్టజెప్పారు. ఈ వ్యవహారంపై అనుమానం వచ్చిన సాన్‌వానే అనే వ్యక్తి పోలీసులకు ఫిర్యాదు చేశాడు. దీంతో కేసు నమోదు చేసుకున్న పోలీసులు విచారణ చేపట్టారు.