అమృతలూరు పోలీస్‌స్టేషన్‌లో వాలంటీర్‌ హల్‌చల్‌

బైకు అపహరణ కేసులో తన సోదరుడిని తీసుకొచ్చారని ఆగ్రహం

అమృతలూరు, న్యూస్‌టుడే: బాపట్ల జిల్లా  అమృతలూరు పోలీసుస్టేషన్‌లో శనివారం వైకాపా సానుభూతిపరులు హల్‌చల్‌ చేశారు. అందులో ఒక వాలంటీరు ఉన్నాడు. పోలీసుల కథనం ప్రకారం.. మండలంలోని పాంచాళవరం గ్రామానికి చెందిన తురుమెళ్ల స్లారా అనే వ్యక్తి పాతకేసులో నిందితుడు. చెరుకుపల్లి మండలంలో ఇటీవల ద్విచక్ర వాహనం అపహరణకు గురైంది. ఈ వాహనం స్లారా వద్ద ఉండడం చూసిన వాహనదారులు పోలీస్‌స్టేషన్‌కు బైకుతో సహా నిందితుడిని పట్టుకొచ్చారు. ఈ విషయం తెలిసి నిందితుడి అన్న, గ్రామ వాలంటీరు తురుమెళ్ల వెంకట్‌ స్టేషన్‌కు వచ్చి తన తమ్ముడిని ఎందుకు తీసుకొచ్చారని పోలీసులతో గొడవకు దిగాడు. సోదరులిద్దరూ పోలీసులను అసభ్యపదజాలంతో దూషించారు. ఈ గొడవ నేపథ్యంలో స్టేషన్‌ గది అద్దాలు రెండుచోట్ల పగిలిపోయాయి. వాలంటీరు వెంకట్‌, అతని తమ్ముడు స్లారాపై కేసు నమోదు చేసి విచారణ జరుపుతున్నట్లు ఎస్సై అనిల్‌కుమార్‌ చెప్పారు. పోలీసులను భయపెట్టేందుకు స్లారా అద్దాలను తలతో కొట్టుకున్నాడని తెలిపారు. నిందితులు ఇద్దరూ వైకాపాలో క్రియాశీలకంగా తిరుగుతున్నారు.