Gang rape: విద్యార్థినిపై గ్యాంగ్‌రేప్‌.. కాలిన గాయాలతో మృతి

ఉత్తర్‌ప్రదేశ్‌లోని సుల్తాన్‌పుర్‌లో.. సామూహిక అత్యాచారానికి గురైన బాధితురాలు కాలిన గాయాలతో రెండు నెలలపాటు చికిత్స పొందుతూ మంగళవారం ప్రాణాలు విడిచింది. ఈ ఏడాది జనవరి 30న జైసింగ్‌పుర్‌కు చెందిన ఓ విద్యార్థినిని బహ్రీ గ్రామ యువకుడు మహావీర్‌.. తన సన్నిహితుల సాయంతో కిడ్నాప్‌ చేశాడు. అనంతరం ఆమెను గుజరాత్‌లోని సూరత్‌కు తీసుకువెళ్లారు. బాధితురాలి తండ్రి ఫిర్యాదు మేరకు పోలీసులు మహావీర్‌ బృందంపై కేసు నమోదు చేశారు. మార్చి 28న మహావీర్‌, అతడి స్నేహితులు విద్యార్థినిపై అత్యాచారం చేశారు. బాధితురాలు ఎదురుతిరగడంతో ఆమె ఒంటిపై పెట్రోల్‌ పోసి నిప్పంటించారు. ఈ విషయాన్ని నిందితుడు మహావీర్‌ స్వయంగా బాధితురాలి తండ్రికి ఫోనులో తెలియజేశాడు. మార్చి 29న బాధితురాలి తండ్రి.. సుల్తాన్‌పుర్‌ ఎస్పీ సోమన్‌వర్మను కలిసి మొత్తం వివరించాడు. ఎస్పీ ఆదేశాల మేరకు సూరత్‌కు వెళ్లిన పోలీసుల బృందం బాధితురాలిని లఖ్‌నవూ ప్రభుత్వ ఆస్పత్రికి తరలించింది. నిందితుల కోసం పోలీసులు మూడు బృందాలుగా గాలించి.. మహావీర్‌, ధనిరామ్‌లను అరెస్టు చేసి జైలుకు తరలించారు. 60 శాతానికి పైగా కాలిన గాయాలతో చికిత్స పొందుతున్న బాధితురాలు మంగళవారం రాత్రి మరణించింది.