Hyderabad: క్రీడాకారిణికి మంత్రి పేషీ ఉద్యోగి వేధింపులు!

ఈనాడు, హైదరాబాద్‌: ఓ జాతీయ స్థాయి క్రీడాకారిణిని రాష్ట్ర క్రీడా మంత్రి పేషీలోని ఓ పొరుగు సేవల ఉద్యోగి వేధింపులకు గురిచేసిన విషయం వెలుగులోకి వచ్చింది. జాతీయ స్థాయి క్రీడాకారిణి అయినప్పటికీ ప్రోత్సాహం లభించడం లేదని తన సమీప బంధువు సాయంతో ఆమె క్రీడా మంత్రిని కలిసి సాయం చేయాలని విన్నవించింది. దీంతో వివరాలను తన కార్యాలయంలో పనిచేస్తున్న ఉద్యోగికి ఇచ్చి వెళ్లాలని మంత్రి సూచించారు. ఈ నేపథ్యంలోనే ఆమె ఫోన్‌ నంబరు తీసుకున్న ఆ ఉద్యోగి... అసభ్యకరమైన సందేశాలను పంపించాడు. వ్యక్తిగత ఫొటోలను పంపించాలని అడిగాడు. ఈ విషయంపై అతడిని క్రీడాకారిణి బంధువు నిలదీయడంతో మొదట అలాంటిదేమీ లేదని బుకాయించాడు. చివరకు తప్పు చేశానని, క్షమించాలని కోరాడు. ఈ విషయం మంత్రి దృష్టికి వెళ్లడంతో అతడిని కార్యాలయానికి రావొద్దని ఆదేశించినట్లు తెలిసింది. రెండు వారాల నుంచి ఆ ఉద్యోగి విధులకు రావడం లేదని, అతనిపై చర్యలు తీసుకుంటామని మంత్రి కార్యాలయ వర్గాలు తెలిపాయి.