కోటాలో నీట్‌ అభ్యర్థి ఆత్మహత్య

ఈ ఏడాదిలో 28కి చేరిన విద్యార్థుల బలవన్మరణాలు

కోటా: రాజస్థాన్‌లోని కోటాలో విద్యార్థుల ఆత్మహత్యలు కొనసాగుతూనే ఉన్నాయి. తాజాగా మంగళవారం మరో విద్యార్థి ఉరి వేసుకుని ఆత్మహత్యకు పాల్పడ్డాడు. దీంతో ఈ ఏడాదిలో ఇప్పటి వరకు ఆత్మహత్య చేసుకున్న వారి సంఖ్య 28కి చేరింది. పోలీసుల కథనం ప్రకారం.. పశ్చిమబెంగాల్‌కు చెందిన హుస్సేన్‌ అనే విద్యార్థి నీట్‌కు సిద్ధమవుతున్నాడు. మంగళవారం మధ్యాహ్నం స్నేహితులతో కలిసి భోజనం చేసి వసతి గృహంలోని తన గదిలోకి వెళ్లిపోయాడు. ఆ తర్వాత గది నుంచి ఎంతకీ బయటకు రాలేదు. సమాచారం అందుకున్న పోలీసులు ఘటనాస్థలానికి చేరుకొని.. గది తలుపులు తెరిచారు. అక్కడ ఉరి వేసుకుని కనిపించిన ఆ విద్యార్థిని తక్షణమే ఆసుపత్రికి తరలించారు. అతడిని పరీక్షించిన వైద్యులు అప్పటికే మృతి చెందినట్లు ప్రకటించారు. ఈ విషయాన్ని మృతుడి తల్లిదండ్రులకు తెలియజేశారు. అయితే, అతని గదిలో ఎలాంటి ఆత్మహత్య లేఖను పోలీసులు గుర్తించలేదు.