వెంటాడిన పంటనష్టం.. అన్నదాత ఆత్మహత్య

కుమార్తె పెళ్లి నగలను తాకట్టు నుంచి విడిపించలేక మనస్తాపం

సంజామల, న్యూస్‌టుడే: కుమార్తె వివాహం కోసమని దాచి ఉంచిన బంగారు నగలు తాకట్టు పెట్టారు. పంట చేతికొస్తే అప్పు తీర్చి వాటిని తిరిగి తీసుకోవచ్చని ఆశపడ్డారు. కానీ పంటకు చీడపీడలు ఆశించడంతో వారి ఆశలు అడియాశలయ్యాయి. దీంతో మనస్తాపం చెందిన ఆ అన్నదాత ఆత్మహత్యకు పాల్పడిన ఘటన నంద్యాల జిల్లా సంజామల మండలంలో చోటుచేసుకుంది. ఎస్సై ప్రతాప్‌ తెలిపిన వివరాల ప్రకారం.. ఆల్వకొండ గ్రామానికి చెందిన కొత్తమిద్దె రామకృష్ణుడు(40) లక్ష్మీదేవి దంపతులకు ఒక కుమార్తె, ఇద్దరు కుమారులు సంతానం. కుమార్తె నగల్ని రెండేళ్ల క్రితం ఓ ప్రైవేటు వ్యక్తి వద్ద తాకట్టు పెట్టి అప్పు తీసుకున్నారు. ఇటీవల కుమార్తెకు వివాహం నిశ్చయమైంది.

మూడెకరాల్లో తాను సాగు చేసిన మిరపపంట చేతికొస్తే అప్పులు తీర్చి నగలు తీసుకోవచ్చని రామకృష్ణుడు అనుకున్నారు. కానీ పంటను చీడపీడలు ఆశించడంతో పూర్తిగా నష్టపోయారు. తాకట్టులో ఉన్న బంగారాన్ని విడిపించుకునే మార్గం కనిపించకపోవడంతో తీవ్ర మనస్తాపం చెంది ఈ నెల 2న ఇంట్లో ఎవరికీ చెప్పకుండా బయటకు వెళ్లారు. కుటుంబ సభ్యులు గాలించినా ఆచూకీ లభించలేదు. సోమవారం గ్రామం వెలుపల ఓ బావిలో ఆయన మృతదేహం కనిపించింది. మృతుడి భార్య ఫిర్యాదు మేరకు మంగళవారం కేసు నమోదు చేసి దర్యాప్తు చేస్తున్నట్లు పోలీసులు వెల్లడించారు.