అత్తమామల చేతిలో శివాని బలి.. చితిలో కాలిన శవంతో ఠాణాకు!

చితిలో కాలిపోతున్న కుమార్తె మృతదేహాన్ని బయటకు తీసిన తల్లిదండ్రులు.. దాన్ని అలాగే తీసుకొని పోలీస్‌స్టేషనుకు వెళ్లారు. తమ కుమార్తెను ఆమె అత్తమామలే చంపారని, సాక్ష్యాలను తారుమారు చేసేందుకే దహన సంస్కారాల గురించి కనీసం సమాచారం కూడా ఇవ్వలేదని ఫిర్యాదు చేశారు. పోలీసులు ఆ మృతదేహాన్ని పరీక్షల కోసం ఆస్పత్రికి తరలించారు. ఉత్తర్‌ప్రదేశ్‌లోని అలీగఢ్‌లో ఈ దారుణం జరిగింది. అలీగఢ్‌లోని ఖైర్‌ పోలీస్‌స్టేషను పరిధికి చెందిన శివాని అనే యువతికి లోకేశ్‌తో ఏడాదిన్నర క్రితం వివాహం జరిగింది. పెళ్లయిన నాటి నుంచీ అదనపు కట్నం, కారు కోసం కోడల్ని అత్తమామలు వేధించేవారు. ఈ క్రమంలో అకస్మాత్తుగా శివాని మృతి.. హడావుడి అంత్యక్రియల ఏర్పాట్లు జరిగాయి. కుమార్తె మరణవార్త విని శ్మశానానికి చేరుకున్న శివాని తల్లిదండ్రులు.. అప్పటికే చితిలో కాలుతున్న మృతదేహాన్ని స్థానికుల సాయంతో బయటకుతీసి పోలీసులను ఆశ్రయించారు. పరారీలో ఉన్న శివాని అత్తమామలను అదుపులోకి తీసుకొన్న పోలీసులు కేసు దర్యాప్తు చేస్తున్నారు.