Murder: అతిథులకు ట్రే తగిలిందని వెయిటర్‌ దారుణ హత్య

లఖ్‌నవూ: ఉత్తర్‌ప్రదేశ్‌లో దారుణం చోటుచేసుకుంది. వివాహ వేడుకలో పాత్రలు తీసుకువెళుతున్న ట్రే అతిథులకు తగిలిందనే కారణంతో వెయిటర్‌ను కొందరు వ్యక్తులు దారుణంగా కొట్టి చంపారు. గాజియాబాద్‌లో చోటుచేసుకున్న ఈ ఘటన ఆలస్యంగా వెలుగులోకి వచ్చింది.

వివాహ వేడుకల కాంట్రాక్టర్‌ మనోజ్‌ వద్ద పంకజ్‌(26) పని చేస్తున్నాడు. ఇటీవల ఓ గెస్ట్‌ హౌస్‌లో జరిగిన వివాహానికి పంకజ్‌ను వెయిటర్‌గా తీసుకెళ్లాడు. అతడు అతిథులు భోజనం చేసిన తర్వాత పాత్రలను ఒక ట్రేలో వేసుకుని వెళుతుండగా అడ్డుగా ఉన్న వ్యక్తులకు అది తగిలింది. దీంతో వారి మధ్య వాగ్వాదం ముదిరి గొడవకు దారి తీయడంతో పంకజ్‌ను కాంట్రాక్టర్‌ మనోజ్‌ సహా మరికొందరు తీవ్రంగా చితకబాదారు. ఆ దెబ్బలకు తాళలేక పంకజ్‌ ప్రాణాలు కోల్పోయాడు. నిందితులు మృతదేహాన్ని సమీపంలో ఉన్న అడవిలో పడేశారు. పనికి వెళ్లిన కుమారుడు ఇంటికి రాకపోవడంతో అతడి తల్లి పోలీసులకు ఫిర్యాదు చేయడంతో ఈ ఘటన వెలుగులోకి వచ్చింది. కేసు నమోదు చేసిన పోలీసులు ముగ్గురు వ్యక్తులను అదుపులోకి తీసుకున్నారు.