నల్లమలలో వేటగాళ్ల అరెస్టు

పదర (అమ్రాబాద్‌), న్యూస్‌టుడే: వన్యప్రాణుల ఉనికి తెలుసుకునేందుకు అటవీ ప్రాంతంలో ఏర్పాటు చేసిన నిఘా కెమెరాలు వేటగాళ్లను పట్టించాయి. దీంతో అటవీ అధికారులు ముగ్గురిని అరెస్టు చేయగా మరొకరు పరారీలో ఉన్నారు. నాగర్‌కర్నూల్‌ జిల్లా పదర మండలం మద్దిమడుగు రేంజ్‌ అధికారి ఆదిత్య కథనం ప్రకారం.. మద్దిమడుగు రేంజ్‌లోని పందిగుండం సెక్షన్‌ ఉమ్మన్‌పెంట పడమర బీట్‌లో జనవరిలో అక్కడక్కడా 4 నిఘా కెమెరాలు అమర్చారు. వాటిని నిక్షిప్తమైన దృశ్యాలను అధికారులు ఈ నెల 23న పరిశీలించారు. 2వ తేదీన కొందరు మనుబోతును వేటాడి తీసుకెళ్తున్నట్లు కనిపించాయి. వారిని అటవీ శాఖలో పేపర్‌పిక్కర్‌, ఎనిమల్‌ ట్రాకర్‌గా తాత్కాలిక పద్ధతిన ఉద్యోగులుగా పనిచేస్తున్న మద్దిమడుగుకు చెందిన దాసరి లాలు, దాసరి శ్రీను, మద్దిమడుగుకే చెందిన కృష్ణ, కాశమోని రామంజిగా గుర్తించారు. వీరిలో రామంజి పరారీలో ఉండగా మిగిలిన ముగ్గురిని శనివారం అదుపులోకి తీసుకున్నారు. వీరిని బెయిలుపై విడుదల చేసినట్లు ఎఫ్‌ఆర్వో తెలిపారు.