పరీక్ష రాసేందుకు వెళ్తుండగా ప్రమాదం

యూపీలో నలుగురు పాఠశాల విద్యార్థుల మృతి

లఖ్‌నవూ: ఉత్తర్‌ప్రదేశ్‌లో విషాదం చోటుచేసుకుంది. బోర్డు పరీక్షలకు హాజరయ్యేందుకు వెళ్తుండగా జరిగిన రోడ్డు ప్రమాదంలో నలుగురు విద్యార్థులు మృతిచెందారు. మరో ఆరుగురు గాయపడ్డారు. పోలీసులు తెలిపిన వివరాల ప్రకారం.. విద్యార్థులు యూపీ బోర్డు పరీక్షలు రాసేందుకు మంగళవారం జైతీపుర్‌లోని ఓ పాఠశాలకు కారులో బయలుదేరారు. ఈ క్రమంలోనే జరవావ్‌ గ్రామంలో కారు అదుపుతప్పింది. చెట్టును ఢీ కొట్టి పక్కనే ఉన్న కాలువలో పడిపోయింది. ఈ దుర్ఘటనలో ముగ్గురు విద్యార్థులు ఘటనాస్థలంలోనే మృతిచెందారు. మరొకరు ఆసుపత్రిలో చికిత్స పొందుతూ కన్నుమూశారు. క్షతగాత్రుల ఆరోగ్యం నిలకడగా ఉన్నట్లు పోలీసులు తెలిపారు.