భర్త మృతిని తట్టుకోలేక ఆత్మహత్య.. నవదంపతుల విషాదాంతం

దిల్లీ: సరదాగా విహారానికి వెళ్లిన ఓ కొత్తజంట మృత్యువు తమను వెంటాడుతోందని తెలుసుకోలేకపోయింది. దిల్లీలోని గాజియాబాద్‌కు చెందిన అభిషేక్‌ అహ్లూవాలియా (25)కు అంజలి అనే యువతితో మూడు నెలల కిందటే వివాహమైంది. వైశాలిలోని ఓ అపార్ట్‌మెంటులో వీరు ఉంటున్నారు. సోమవారం ఇద్దరూ దిల్లీ జంతు ప్రదర్శనశాలకు వెళ్లారు. అక్కడ అభిషేక్‌కు ఛాతీలో నొప్పి రావడంతో స్నేహితులు గురుతేజ్‌ బహదూర్‌ ఆసుపత్రికి తీసుకువెళ్లారు. పరిస్థితి విషమించడంతో సఫ్దర్‌జంగ్‌ ఆసుపత్రికి తరలించగా, చికిత్స పొందుతూ అభిషేక్‌ మృతిచెందాడు. ఇంటికి తీసుకొచ్చిన భర్త మృతదేహాన్ని చూసి తట్టుకోలేకపోయిన అంజలి ఏడో అంతస్తులోని బాల్కనీ నుంచి దూకి ఆత్మహత్యకు పాల్పడింది. తీవ్రగాయాలపాలైన ఆమెను వైశాలిలోని మ్యాక్స్‌ ఆసుపత్రికి తరలించగా చికిత్స పొందుతూ మంగళవారం తెల్లవారుజామున తుదిశ్వాస విడిచింది. నవదంపతులు ఇద్దరూ ఇలా అర్ధంతరంగా ప్రాణాలు కోల్పోవడంతో బాధిత కుటుంబాల్లో విషాదఛాయలు అలముకున్నాయి.