అనిశా కస్టడీకి ‘గొర్రెల గోల్‌మాల్‌’ నిందితులు

మూడు రోజులపాటు జరగనున్న విచారణ

ఈనాడు, హైదరాబాద్‌: గొర్రెల పంపిణీ పథకం నిధుల్ని పక్కదారి పట్టించిన కేసులో నిందితులైన నలుగురు అధికారుల్ని అవినీతి నిరోధక శాఖ(అనిశా) కస్టడీకి అప్పగించేందుకు అనిశా కేసుల ప్రత్యేక న్యాయస్థానం అనుమతించింది. అయిదు రోజుల కస్టడీ ఇవ్వాలని అనిశా గత వారమే పిటిషన్‌ దాఖలు చేయగా మూడు రోజుల కస్టడీకి అనుమతి లభించింది. ఈ క్రమంలో గురువారం(నేటి) నుంచి శనివారం వరకు అనిశా ఆ నలుగురు నిందితులను తమ కస్టడీలో విచారించనుంది. సుమారు రూ.2.01కోట్ల నిధుల్ని కాజేసిన మొహిదుద్దీన్‌ ముఠాకు ఈ నలుగురు అధికారులు సహకరించిన సంగతి తెలిసిందే. ఈ వ్యవహారంలో కామారెడ్డి ప్రాంతీయ పశువైద్యశాల సహాయ సంచాలకుడు డా.రవి, మేడ్చల్‌ జిల్లా పశువైద్యశాఖ సహాయ సంచాలకుడు డా.ఎం.ఆదిత్య కేశవసాయి, రంగారెడ్డి జిల్లా భూగర్భ జలశాఖ అధికారి పసుల రఘుపతిరెడ్డి, వయోజన విద్యాశాఖ ఉపసంచాలకుడు సంగు గణేష్‌ను అనిశా ఇప్పటికే అరెస్టు చేసింది. మొహదుద్దీన్‌ ముఠాకు వీరు ఏ పరిస్థితుల్లో సహకరించారు అనే అంశంపై అనిశా ఈ నలుగురిని విచారించనుంది.