ఏపీలో రహదారి గుంతలకు పోలీసు బలి

బూర్జ, న్యూస్‌టుడే: రాష్ట్రంలో రహదారి గుంతలు మరో నిండు ప్రాణాన్ని బలి తీసుకున్నాయి. తాజాగా శ్రీకాకుళం జిల్లా బూర్జ మండలంలోని శ్రీకాకుళం-పాలకొండ ప్రధాన రహదారిలో ఓ పోలీసు కానిస్టేబుల్‌ మృతి చెందారు. కానిస్టేబుల్‌ కొత్తూరు సురేష్‌(39) శుక్రవారం మధ్యాహ్నం ద్విచక్ర వాహనంపై బూర్జ నుంచి కొల్లివలస వైపు వెళ్తున్నారు. నీలాదేవిపురం కూడలి సమీపంలోకి రాగానే  రహదారిపైనున్న గుంతలను తప్పించబోయి కిందపడ్డారు. ఈ క్రమంలో సురేష్‌ తలకు తీవ్ర గాయమైంది. స్థానికులు శ్రీకాకుళం ప్రభుత్వ ఆసుపత్రికి తరలించారు. అక్కడి నుంచి మెరుగైన వైద్యం కోసం ప్రైవేటు ఆసుపత్రికి తరలిస్తుండగా మృతి చెందారు. సురేష్‌ది విజయనగరం జిల్లా రామ్‌నగర్‌. ఘటనపై కేసు నమోదు చేసి దర్యాప్తు చేస్తున్నట్లు పోలీసులు తెలిపారు. రాష్ట్రంలో అస్తవ్యస్తమైన రోడ్ల వల్ల ఇటీవల తరచూ జరుగుతున్న ప్రమాదాలతో వాహనదారుల ప్రాణాలు పోతున్నాయి. ఈ మార్గంలోని గుంతల వల్ల తరచూ వాహనాలు అదుపు తప్పి ప్రమాదాలు జరుగుతున్నాయని స్థానికులు ఆవేదన వ్యక్తం చేస్తున్నారు.