దిగుబడిపై దిగులుతో కౌలురైతు ఆత్మహత్య

శంకరపట్నం, న్యూస్‌టుడే: ఓ వైపు పంట దిగుబడి కలవరం.. మరోవైపు ఆర్థిక ఇబ్బందుల సతమతంతో కౌలురైతు ఆత్మహత్య చేసుకున్న ఘటన కరీంనగర్‌ జిల్లా శంకరపట్నం మండలంలో చోటు చేసుకుంది. ఏఎస్సై సుధాకర్‌ తెలిపిన వివరాల ప్రకారం.. కాచాపూర్‌ గ్రామానికి చెందిన గుజ్జుల మల్లారెడ్డి(57) కొన్నేళ్లుగా పదెకరాలు కౌలుకు తీసుకొని వరి సాగు చేస్తున్నారు. పోయిన సీజన్‌లో మొగిపురుగు సోకి సరైన దిగుబడి రాలేదు. ఈసారి కూడా తెగుళ్లు తదితర కారణాలతో ఆశించిన మేర దిగుబడి వచ్చేలా కనిపించలేదు. దీనికి తోడు కుటుంబ ఆర్థిక ఇబ్బందులతో తీవ్ర మనస్తాపానికి గురై ఆదివారం పొలం వద్ద పురుగు మందు తాగారు. కుటుంబసభ్యులు గమనించి జమ్మికుంటలోని ఓ ప్రైవేటు ఆసుపత్రిలో చేర్చగా చికిత్స పొందుతూ సోమవారం తెల్లవారుజామున మృతిచెందారు. ఆయనకు భార్య, కొడుకు, కుమార్తె ఉన్నారు. కేసు నమోదు చేసుకొని దర్యాప్తు చేస్తున్నట్లు ఏఎస్సై పేర్కొన్నారు.