పెట్రోలు పోసి.. మంటల్లోకి తోసి

స్థలం ఆక్రమణను అడ్డుకున్నందుకు.. ఒంటరి మహిళపై వైకాపా నాయకుడి హత్యాయత్నం

విశాఖపట్నం (గాజువాక), న్యూస్‌టుడే: ఖాళీ స్థలం ఆక్రమణను అడ్డుకున్నందుకు విశాఖలో ఒంటరి మహిళపై వైకాపా నాయకుడు పెట్రోలు పోసి, సజీవ దహనం చేసేందుకు ప్రయత్నించాడు. బాధితురాలు, న్యూపోర్టు పోలీస్‌స్టేషన్‌ సీఐ దాలిబాబు తెలిపిన వివరాల ప్రకారం.. 65వ వార్డు భానోజీతోట ప్రాంతానికి చెందిన జలుమూరి రాధ(41)ను వార్డు వైకాపా అధ్యక్షుడు ఎం.లోకనాథం తరచూ వేధింపులకు గురిచేస్తున్నాడు. కొత్తగా ఇంటి పట్టా ఇప్పిస్తానని పలుమార్లు ఆమె దగ్గర డబ్బులు వసూలు చేశాడు. అంతటితో ఆగకుండా రాధ ఇంటి సమీపంలో ఖాళీ స్థలాన్ని ఆక్రమించేందుకు ప్రయత్నిస్తుండటంతో.. బాధితురాలు అతనిపై పోలీసులకు ఫిర్యాదు చేశారు. శుక్రవారం లోకనాథం తన కుటుంబ సభ్యులతో కలిసి సంబంధిత ఖాళీ స్థలాన్ని చదును చేసి, అక్కడి వ్యర్థాలకు నిప్పుపెట్టాడు. ఆక్రమణపై మరోసారి రాధ ప్రశ్నించడంతో.. తీవ్రంగా ఆగ్రహించిన లోకనాథం ఆమెపై పెట్రోలు పోసి, మంటల్లోకి తోసేశాడు. ముఖం, చేతులపై తీవ్ర గాయాలైన బాధితురాలిని స్థానికులు కింగ్‌జార్జి ఆసుపత్రికి తరలించి చికిత్స అందిస్తున్నారు. రాధ ఇచ్చిన ఫిర్యాదు మేరకు లోకనాథం, ఆయన కుటుంబ సభ్యులు శ్యామలారావు, శకుంతలపై పోలీసులు కేసు నమోదు చేశారు.