అస్వస్థతకు గురైన గురుకుల విద్యార్థి మృతి

ప్రిన్సిపల్‌పై సస్పెన్షన్‌ వేటు

భువనగిరి నేరవిభాగం, న్యూస్‌టుడే: భువనగిరి సాంఘిక సంక్షేమ గురుకుల బాలుర పాఠశాలలో కలుషిత ఆహారం వల్ల తీవ్ర అస్వస్థతకు గురైన విద్యార్థి ప్రశాంత్‌(12) మంగళవారం రాత్రి మృతిచెందాడు. యాదాద్రి భువనగిరి జిల్లా పోచంపల్లి మండలం జిబ్లిక్‌పల్లికి చెందిన మహేశ్‌ కుమారుడు ప్రశాంత్‌ ఆరో తరగతి చదువుతున్నాడు. ఈ నెల 12న కలుషిత ఆహారం వల్ల సుమారు 30 మంది విద్యార్థులు అస్వస్థతకు గురయ్యారు. ప్రశాంత్‌ పరిస్థితి ఆందోళనకరంగా ఉండటంతో 13న హైదరాబాద్‌ తరలించారు. ప్రైవేట్‌ ఆసుపత్రిలో మృత్యువుతో పోరాడి మంగళవారం రాత్రి ప్రాణాలు కోల్పోయాడు. అస్వస్థతకు గురైన వారిలో సికింద్రాబాద్‌ గాంధీ ఆసుపత్రిలో ముగ్గురు, ఉస్మానియాలో ఇద్దరు, భువనగిరి జిల్లా ఆసుపత్రిలో ఏడుగురు చికిత్స పొందుతున్నారు. ఘటనకు బాధ్యుడిగా ప్రిన్సిపల్‌ శ్రీరాముల శ్రీనివాస్‌ను సస్పెండ్‌ చేస్తూ గురుకులాల సంస్థ కార్యదర్శి సీతాలక్ష్మి ఉత్తర్వులు జారీ చేశారు. వైస్‌ ప్రిన్సిపల్‌ రాముకు బాధ్యతలు అప్పగించారు.