కబడ్డీ నేర్పిస్తామని నమ్మించి ఎస్సీ బాలికపై అత్యాచారం

ముగ్గురిపై పోక్సో కేసు

అవనిగడ్డ, న్యూస్‌టుడే: కబడ్డీ ఆటలో మెలకువలు చెబుతామంటే నమ్మి వారి వద్దకు వెళ్లిన ఓ ఎస్సీ బాలికపై ముగ్గురు అత్యాచారానికి పాల్పడిన ఘటన కృష్ణా జిల్లా అవనిగడ్డలో ఆలస్యంగా వెలుగులోకి వచ్చింది. ఎస్‌ఐ రమేష్‌బాబు తెలిపిన ప్రకారం.. ఇటీవలే పదో తరగతి పూర్తిచేసిన ఓ బాలిక (16) రోజూ స్థానికంగా ఓ మైదానానికి వెళ్లి కబడ్డీ ప్రాక్టీస్‌ చేసేవారు. అదే మైదానానికి వచ్చే ప్రైవేటు శిక్షకుడు టి.పవన్‌కుమర్‌, క్రీడాకారులు సీహెచ్‌.డోగేంద్ర మహావిష్ణు, పి.కొండలరావు.. తాము ఉంటున్న చోటికి వస్తే కబడ్డీలో మరిన్ని మెలకువలు నేర్పిస్తామని బాలికను నమ్మించారు. వారితో ఉన్న పరిచయం కారణంగా ఈ నెల 7న వారి గదికి వెళ్లిన బాలికను ముగ్గురూ అత్యాచారం చేసి వీడియో తీశారు. దాని ఆధారంగా బెదిరించి 8, 9 తేదీల్లో కూడా వారి గదికి రప్పించుకున్నారు. అప్పటి నుంచి ముభావంగా ఉంటున్న బాలికను తల్లి ప్రశ్నించడంతో మంగళవారం ఈ విషయం బయటపడింది. అనంతరం పోలీసులకు ఫిర్యాదు చేయడంతో నిందితులపై పోక్సో, ఎస్సీ, ఎస్టీ ఎట్రాసిటీ కేసులు నమోదు చేశారు.