గుజరాత్‌లో రోడ్డు ప్రమాదం.. 10 మంది దుర్మరణం

అహ్మదాబాద్‌: గుజరాత్‌లో ఆగివున్న చమురు ట్యాంకర్‌ను వేగంగా వెళుతున్న కారు ఢీకొట్టింది. ఈ ఘటనలో ఓ చిన్నారి సహా 10 మంది దుర్మరణం చెందినట్లు పోలీసులు తెలిపారు. వడోదర నుంచి అహ్మదాబాద్‌ వైపు వెళ్తున్న కారు ఖేదా జిల్లాలోని నడియాద్‌ వద్ద అహ్మదాబాద్‌- వడోదర ఎక్స్‌ప్రెస్‌వేపై ప్రమాదానికి గురైంది. రోడ్డు పక్కన నిలిపిఉన్న ట్యాంకర్‌ను వెనక నుంచి బలంగా ఢీకొట్టి నుజ్జునుజ్జయింది. దీంతో 8 మంది అక్కడికక్కడే ప్రాణాలు కోల్పోగా.. ఇద్దరికి తీవ్ర గాయాలయ్యాయి. వారు చికిత్స పొందుతూ ప్రాణాలు విడిచినట్లు పోలీసులు తెలిపారు. మరణించిన వారిలో గుజరాత్‌లోని వివిధ నగరాలకు చెందిన వారు ఉన్నారని, ఇప్పటి వరకు నలుగురిని మాత్రమే గుర్తించామని చెప్పారు.