అప్పుల బాధతో రైతు బలవన్మరణం

ఎల్లారెడ్డిపేట, న్యూస్‌టుడే: అప్పుల బాధతో ఓ రైతు ఉరేసుకొని బలవన్మరణానికి పాల్పడిన సంఘటన రాజన్న సిరిసిల్ల జిల్లా ఎల్లారెడ్డిపేట మండలం రాగట్లపల్లిలో శుక్రవారం చోటుచేసుకుంది. ఎస్సై రమాకాంత్‌ తెలిపిన వివరాల ప్రకారం..గ్రామానికి చెందిన నెత్తెట్ల మల్లయ్య (48) అనే రైతు తనకున్న మూడెకరాల భూమిలో వ్యవసాయం చేసుకుంటూ కుటుంబాన్ని పోషించుకునేవారు. ఏడాది క్రితం రూ. 3 లక్షలు అప్పు చేసి భూమిని చదును చేయించారు. యాసంగిలో పంట సాగు కోసం రూ. 1.50 లక్షలను పెట్టుబడిగా పెట్టగా, ఇంటి నిర్మాణానికి మరో రూ. 10 లక్షల వరకు ఖర్చు చేశారు. మొత్తం రూ. 15 లక్షల వరకు అప్పులు కాగా..వాటిని తీర్చే మార్గం కనిపించలేదు. దీంతో మనస్తాపం చెందిన మల్లయ్య గురువారం రాత్రి తన పొలం సమీపంలో ఉన్న ఓ చెట్టుకు ఉరేసుకొన్నాడు. శుక్రవారం గొర్రెల కాపరులు గమనించి కుటుంబ సభ్యులకు సమాచారం అందించడంతో సంఘటన స్థలానికి చేరుకుని కన్నీరుమున్నీరయ్యారు. మల్లయ్యకు భార్య సత్తవ్వ, కుమారుడు అజయ్‌, కుమార్తె అమూల్య ఉన్నారు. మృతుడి భార్య ఫిర్యాదు మేరకు కేసు నమోదు చేసి, దర్యాప్తు చేస్తున్నట్లు ఎస్సై రమాకాంత్‌ తెలిపారు.