చంద్రబాబు సభకు వెళ్లారని హత్యాయత్నం

తోటపల్లిగూడూరు, న్యూస్‌టుడే: శ్రీపొట్టిశ్రీరాములు నెల్లూరు జిల్లా పొదలకూరులో శనివారం జరిగిన చంద్రబాబు బహిరంగ సభకు వెళ్లాడనే అక్కసుతో తెదేపా కార్యకర్తపై వైకాపా మద్దతుదారులు హత్యాయత్నానికి పాల్పడ్డారు. కోడూరు పంచాయతీ వెంకటేశ్వరపాలెంలో శనివారం రాత్రి ఈ ఘటన జరిగింది. బాధితులు తెలిపిన వివరాల ప్రకారం.. గ్రామానికి చెందిన పామంజి శ్రీరాములు స్థానికులతో కలిసి చంద్రబాబు సభకు వెళ్లి తిరిగి అర్ధరాత్రి స్వగ్రామానికి చేరుకున్నారు. ఈ సమయంలో వైకాపా కార్యకర్త ఈశ్వరయ్య మరో నలుగురు వ్యక్తులతో కలిసి గొడవకు దిగాడు. ఒక్కసారిగా కత్తులతో దాడికి పాల్పడ్డాడు. ఈ ఘటనలో శ్రీరాములుకు తీవ్రంగా గాయాలవడంతో నెల్లూరులోని ప్రైవేట్‌ వైద్యశాలకు తరలించారు. ప్రస్తుతం అత్యవసర విభాగంలో చికిత్స పొందుతున్నారు. పోలీసులు కేసు నమోదు చేసి దర్యాప్తు చేస్తున్నారు.