ఏపీలో క్రికెట్‌ బెట్టింగ్‌ నిర్వహిస్తున్న వైకాపా నాయకుడి అరెస్టు

రూ.2.50 లక్షల నగదు స్వాధీనం

ఆదోని నేరవార్తలు, న్యూస్‌టుడే: కర్నూలు జిల్లా ఆదోని పట్టణంలో ఐపీఎల్‌ క్రికెట్‌ బెట్టింగ్‌ నిర్వహిస్తున్న వైకాపా నాయకుడు బోయ మహానందిని మూడో పట్టణ పోలీసులు సోమవారం అరెస్టు చేశారు. డీఎస్పీ శివనారాయణస్వామి, సీఐ నరసింహరాజు తెలిపిన వివరాల ప్రకారం.. ఆదోని పట్టణ శివారు ఎమ్మిగనూరు రహదారి సమీపంలోని కొండల్లో వైకాపా నాయకుడు మహానందితో పాటు మరికొందరు కలిసి క్రికెట్‌ బెట్టింగ్‌ నిర్వహిస్తుండగా దాడులు చేసి పట్టుకున్నామన్నారు. మహానంది కుమారుడు బోయ రమేశ్‌, ఎమ్మిగనూరుకు చెందిన షహీద్‌, కార్వన్‌పేటకు చెందిన బెస్త వినోద్‌ను అరెస్టు చేసి వారినుంచి రూ.2.50లక్షల నగదు, 4 సెల్‌ఫోన్లను స్వాధీనం చేసుకున్నామని తెలిపారు. మహానంది నాలుగేళ్లుగా ఆయన కుమారుడుతో కలిసి క్రికెట్‌ బెట్టింగ్‌ నిర్వహిస్తున్నట్లు తమ విచారణలో తేలిందన్నారు. కాగా గతేడాదీ మహానంది క్రికెట్‌ బెట్టింగ్‌ నిర్వహిస్తుండగా పోలీసులు అరెస్టు చేసి అతని నుంచి రూ.80లక్షల నగదు స్వాధీనం చేసుకున్నారు.