పిడుగుపాటుకు ముగ్గురు రైతుల దుర్మరణం

న్యూస్‌టుడే- తాండూరు, యాలాల: వికారాబాద్‌ జిల్లా యాలాల మండలం జుంటుపల్లి, బెన్నూరు గ్రామాల్లో  పిడుగుపాటుతో ఆదివారం ముగ్గురు రైతులు దుర్మరణం చెందారు. జుంటుపల్లికి చెందిన మంగలి శ్రీనివాస్‌ (30), కొనింటి లక్ష్మప్ప (45) పొలాలు పక్కపక్కనే ఉన్నాయి. వరి పంట కోతకు వీరు ఆదివారం యంత్రాన్ని తెప్పించారు. కోత ప్రారంభానికి ముందు ఉరుములు, మెరుపులతో వర్షం కురవడంతో.. యంత్రం కిందకు వెళ్లి తలదాచుకున్నారు. అదే సమయంలో అక్కడ పిడుగు పడడంతో ఇద్దరూ ప్రాణాలు కోల్పోయారు. మిషన్‌ డ్రైవర్‌ తుకారాం స్పృహ కోల్పోవడంతో తాండూరు జిల్లా ఆసుపత్రికి తరలించారు. బెన్నూరులో గొల్ల వెంకప్ప (60) పొలంలో ఎరువు చల్లుతుండగా.. పిడుగుపాటుకు గురై అక్కడే మృతి చెందారు.