కోటపల్లిలో చిరుతపులి చర్మం స్వాధీనం

ఇద్దరిని అదుపులోకి తీసుకున్న పోలీసులు 

చెన్నూరు, న్యూస్‌టుడే: మంచిర్యాల జిల్లా కోటపల్లి మండలంలోని రాపన్‌పల్లి అంతర్రాష్ట్ర చెక్‌పోస్టు వద్ద సోమవారం చిరుతపులి చర్మాన్ని పోలీసులు స్వాధీనం చేసుకున్నారు. జైపూర్‌ ఏసీపీ వెంకటేశ్వర్‌ తెలిపిన వివరాల ప్రకారం..ఛత్తీస్‌గఢ్‌ రాష్ట్రంలోని బీజాపుర్‌ అటవీప్రాంతంలో రెండేళ్ల కిత్రం వర్దల్లి గ్రామానికి చెందిన దుర్గం పవన్‌ చిరుతపులిని హతమార్చి చర్మాన్ని తీసి దాచాడు. లింగపూర్‌ గ్రామానికి చెందిన బాబర్‌ఖాన్‌తో కలిసి మంచిర్యాలలో చర్మాన్ని విక్రయించేందుకు వస్తుండగా కోటపల్లి ఎస్సై రాజేందర్‌ రాపన్‌పల్లి చెక్‌పోస్టు వద్ద వీరిద్దరినీ అదుపులోకి తీసుకున్నారు. నిందితుల వద్దనుంచి చిరుతపులి చర్మంతో పాటు రెండు ద్విచక్ర వాహనాలు, రెండు సెల్‌ఫోన్లను స్వాధీనం చేసుకుని కేసు నమోదు చేసి తదుపరి విచారణ కోసం అటవీశాఖ అధికారులకు అప్పజెప్పారు.