కారులో ఊపిరాడక చిన్నారి మృతి

భద్రాద్రి కొత్తగూడెం జిల్లాలో ఘటన

కలిష

మణుగూరు, న్యూస్‌టుడే: ఆగి ఉన్న కారులోకి ఆడుకుంటూ వెళ్లి ఎక్కిన ఓ చిన్నారి ఊపిరాడక మృతి చెందింది. ఈ విషాద సంఘటన భద్రాద్రి కొత్తగూడెం జిల్లా మణుగూరు మండలం సాంబాయిగూడెంలో మంగళవారం చోటుచేసుకుంది. స్థానికులు, కుటుంబ సభ్యులు తెలిపిన వివరాలు ప్రకారం.. సాంబాయిగూడెంకు చెందిన మడకం సాయి, లిఖిత దంపతులకు మూడేళ్ల కుమార్తె కలిష(మింకు), 5 నెలల కుమారుడు సంతానం. మంగళవారం మధ్యాహ్నం 3 గంటల సమయంలో కలిష ఆడుకోవడానికి ఇంటి నుంచి బయటకు వెళ్లింది. ఎంతకు తిరిగిరాకపోవడంతో తల్లిదండ్రులు ఆ ప్రాంతమంతా కలియతిరిగారు. చివరికి మంగళవారం రాత్రి 8 గంటల సమయంలో ఇంటి సమీపంలో ఆగి ఉన్న ఓ కారులోకి తొంగిచూడగా చిన్నారి అపస్మారకస్థితిలో పడి ఉన్నట్లు గుర్తించారు. తల్లిదండ్రులు ఆసుపత్రికి తీసుకువెళ్లేసరికే మృతి చెందింది. కారులోకి వెళ్లిన తర్వాత డోర్‌ తీయడం రాక, ఆక్సిజన్‌ అందక కలిష మృతి చెంది ఉంటుందని స్థానికులు భావిస్తున్నారు.