రసాయన పరిశ్రమలో పేలిన బాయిలర్‌

8 మంది దుర్మరణం.. 60 మందికి గాయాలు
మహారాష్ట్రలో దుర్ఘటన

ఠాణె: మహారాష్ట్ర ఠాణెలోని ఓ రసాయన పరిశ్రమలో గురువారం భారీ పేలుడు సంభవించింది. ఈ ప్రమాదంలో ఎనిమిది మంది మృతి చెందగా.. దాదాపు 60 మంది గాయపడ్డారు. డోంబివిలి పరిధి ఎంఐడీసీ ఫేజ్‌-2లోని అముదాన్‌ పరిశ్రమను గత కొద్దినెలలుగా మూసివేసి ఉంచారు. ఇటీవలే పునఃప్రారంభించగా.. బాయిలర్‌ పేలడంతో ఈ విషాదం చోటుచేసుకుంది. ఇప్పటివరకు ఆరుగురు పురుషులు, ఇద్దరు మహిళలు మృతిచెందినట్లు.. వారంతా చుట్టుపక్కల పరిశ్రమల్లో పనిచేస్తున్నవారేనని అధికారులు తెలిపారు. ఈ పేలుడు ప్రభావంతో పరిసరాల్లోని ఇళ్లు దెబ్బతినడంతోపాటు కిలోమీటరు దూరం వరకూ శబ్దం వినిపించిందని ప్రత్యక్ష సాక్షులు పేర్కొన్నారు.