గన్‌పౌడర్‌ పరిశ్రమలో భారీ పేలుడు.. ఒకరి మృతి...ఆరుగురికి గాయాలు

 బెమెతరా: ఛత్తీస్‌గఢ్‌ రాష్ట్రం బెమెతరా జిల్లాలో భారీ ప్రమాదం జరిగింది. పిర్దా గ్రామ పరిధిలోని  గన్‌ పౌడర్‌ తయారీ పరిశ్రమలో శనివారం ఉదయం పేలుడు సంభవించడం వల్ల ఒకరు మరణించారు. ఆరుగురు గాయపడ్డారు. పలువురి ఆచూకీ లభించడంలేదు. మృతుల సంఖ్య పెరగవచ్చన్న ఆందోళన వ్యక్తమవుతోంది. క్షతగాత్రులను రాయ్‌పుర్‌లోని ఓ ఆస్పత్రికి తరలించారు. కలెక్టర్‌ రణబీర్‌ శర్మ ప్రమాద స్థలాన్ని సందర్శించారు. సహాయక పనులు కొనసాగుతున్నాయి. పేలుడు తీవ్రత వల్ల ఘటనా స్థలంలో 40 అడుగుల లోతు గోయి ఏర్పడింది. రెండంతస్తుల భవనం కుప్పకూలింది. అక్కడ పని చేసే కార్మికులు శిథిలాల్లో చిక్కుకుపోయారని భావిస్తున్నారు. ప్రమాదానికి కారణాలు తెలియరాలేదు. విచారణకు ఆదేశించినట్లు ఛత్తీస్‌గఢ్‌ డిప్యూటీ సీఎం అరుణ్‌ సావో తెలిపారు.