పుణె కారు ప్రమాద ఘటనలో డ్రైవర్‌ను ఇరికించే కుట్ర

నిందితుడి తాత అరెస్టు

పుణె: ఓ మైనర్‌ దురుసు డ్రైవింగ్‌ కారణంగా ఇద్దరు టెకీలు మృతిచెందిన ఘటనలో నిందితుడి తాతను పోలీసులు శనివారం అరెస్టు చేశారు. ఈ కేసులో నేరాన్ని తమ ఫ్యామిలీ డ్రైవర్‌పై మోపేందుకు నిందితుడి తండ్రి, తాత ప్రయత్నించారని పేర్కొన్నారు. ప్రమాదం జరిగిన సమయంలో తానే కారు నడిపినట్లుగా డ్రైవర్‌ అంగీకరించేందుకు  డ్రైవర్‌ కుటుంబానికి వారు పెద్దమొత్తంలో డబ్బు, బహుమతులు ఆశ చూపించారని పోలీసులు న్యాయస్థానానికి వివరించారు. తాము చెప్పినట్లే నడుచుకోవాలని అతడిని బెదిరించారని తెలిపారు. బాలుడి తాత ఇంటి నుంచి సీసీటీవీ ఫుటేజీ, డీవీఆర్‌(డిజిటల్‌ వీడియో రికార్డర్‌)ను స్వాధీనం చేసుకున్నామని, ఫుటేజీ ట్యాంపరింగ్‌ చేసినట్లు ప్రాథమిక విచారణలో తేలిందని పేర్కొన్నారు. బాలుడి తాతపై ఉన్న ఇతర కేసుల వివరాలు కూడా పోలీసులు న్యాయస్థానానికి వివరించారు. ఇరు వర్గాల వాదనలు విన్న కోర్టు అతడికి ఈనెల 28 వరకు రిమాండు విధించింది.